މިދިޔަ ބުރާސްފަތި ދުވަހު އެޗްޑީސީ އިން ނެރެފައިވާ ވިނަރެސް އެކްސެސް ކޮންޓްރޯލް ސިސްޓަމް ބޭނުންކުރުމުގެ އާންމު އުސޫލުގައި ވާގޮތުން އެޗްޑީސީގެ ހުއްދަ އާއި ނުލާ އެކްސެސް ޓެގު ނަކަލުކޮށްފިނަމަ ފުލެޓްގެ ވެރިފަރާތް 5،000.00 ރުފިޔާއާއި 10،000.00 ރުފިޔާއާއި ދެމެދު އަދަދަކުން ޖޫރިމަނާކުރެވޭނެއެވެ.
މި އުސޫލުގައިވާ ގޮތުން ފުލެޓަކަށް އެންމެ ގިނައިން ދޫކުރެވޭނީ 7 ޓެގެވެ. މާލެ ސަރަހައްދުގައި ދިރިއުޅުމުގެ ހާލަތު ހުރިގޮތުން ބައެއް ފުލެޓްތަކުގައި 7 މީހުންނަށްވުރެން ގިނަ މީހުން ދިރިއުޅެންޖެހެއެވެ. އެފަދަ އާއިލާތަކަށް ހައްލެއް އޮންނަން ޖެހޭކަމަށް ގަބޫލުކުރެވެއެވެ.
އަދި ވިނަރެސްގެ ވަރަށް ގިނަ ފުލެޓު ވަނީ ކުއްޔަށްދީފައެވެ. ފުލެޓް ކުއްޔަށް ހިފާ ފަރާތަށްވެސް މި މައުލޫމާތު ފޯރުކޮށްދިނުމަކީ ވަރަށް މުހިންމު ކަމެކެވެ.
ވީމާ ވިނަރެސްގައި ދިރިއުޅޭ ހުރިހާ ފަރާތަކުންވެސް މިކަމަށް ވަރަށްބޮޑަށް ސަމާލުވާން ޖެހެއެވެ. ނޫނީ ފުލެޓްގެ ވެރިފަރާތް 10،000.00 ރުފިޔާއިން ޖޫރިމަނާ ވެދާނެވެ.
އަދި މި އުސޫލުގައިވާގޮތަށް އެކްސް ޓެގު ނަކަލުކުރުން ހުއްޓުވުމަކީ ވަރަށްވެސް މުހިންމު ކަމެކެވެ. ހަމައެއާއިއެކު އެކްސެސް ދޮރުތައް ރަނގަޅަށް މަސައްކަތްކުރާގޮތް ހެދުމަކީ އެޗްޑީސީ އިން ކުރަންޖެހޭ ކަމެކެވެ. އެއީ އެޗްޑީސީގެ ޒިންމާއެކެވެ. މިހާތަނަށް ބެލިބެލުމުން ވިނަރެސްގެ އެއްވެސް ޓަވަރެއްގައި މިސިސްޓަމް ރަނގަޅަށް ގާއިމުކުރެވިފައެއް ނެތެވެ. ފުލެޓުތަކާއި ފުލެޓް ގަތް ފަރާތްތަކުން ހަވާލުވި އިރުވެސް އެކްސެސް ދޮރުތަކާއި ތަޅުތަކާއި އަދި މިސިސްޓަމާއި ގުޅުންހުރި އާލާތްތައް ހުރީ ބޭނުން ކުރެވޭ ހާލަތެއްގައެއް ނޫނެވެ. އަދި މިސިސްޓަމްގައި ބޭނުންކުރެވިފައިވާ ބައިތަކުގެ ފެންވަރު ދަށްކަމުން މި ސިސްޓަމް ބޭނުންކުރަންފެށިތާ ކުޑަ ދުވަސްކޮޅެއްގެ ތެރޭގައި ވަނީ ހަލާކުވާން ފަށާފައެވެ. ބައެއް ދޮރުތަށް ހަލާކުވެފައިވަނީ ބޭނުންކުރާ މީހުންގެ ސަބަބުންނެވެ. އެހެން ނަމަވެސް މި ދޮރުތަކާއި ގުޅިފައިވާ ގިނަ ބައިތައް ހަލާކުވެފައިވަނީ ހަމަ ފެންވަރު ދަށްކަމުންކަމަށް ފާހަގަ ކުރެވެއެވެ.
